Спорт зөвхөн булчин хөгжүүлдэггүй

Британийн эрдэмтэд спортоор байнга хичээллэх нь бие галбирыг хөгжүүлэхээс гадна тархийг ч мөн сайхан галбиртай болгодог гэдгийг нотоллоо. Биеийн тамирын дасгал, хөдөлгөөн нь хүний сэтгэл зүйд эерэг нөлөө үзүүлэхээс гадна сэтгэн бодох чадвар, IQ-д ч сайнаар нөлөөлдөг байна. Манчестерийн их сургуулийн эрдэмтэд танхимд дасгал хийгээд дуусч буй болон спортоор хичээллэж өөрийгөө “тамладаггүй” хүмүүсийг харьцуулан судалгаа явуулжээ. Ингэхдээ соронзон цуурайн томографийн тусламжтайгаар задлан шинжилгээ хийдэг аппарат ашигласан байна. Тандалтаар эхний бүлгийн хүмүүст шийдвэр гаргах чадвар хариуцдаг тархины хэсэгт нь нейроны тоо хэмжээ их байдаг нь тогтоогджээ. Мэдээж энэ нь тэдэнд нөгөө бүлгийнхнээсээ илүү оновчтой, хурдан, зөв шийдвэр гаргах биологийн нөхцөл бүрдсэн байна гэсэн үг. Дараа нь эрдэмтэд сорилын аргаар сэтгэн бодох чадварыг нь шалгасан байна. Тэгэхэд спорт сонирхогчид мөн л толгой эргүүлсэн элдэв тааврын хариуг бусдаасаа богино хугацаанд зөв олсон гэнэ.